D’Funktioun vum/vun der Egalitéitsdelegéierten/-er beim Personal am ëffentlechen Déngscht ass festgeluecht duerch dat groussherzoglecht Reglement vum 5 Mäerz 2004, dat d’Modalitéiten, d’Designatioun, d’Rechter an d’Aufgabe vun den Delegéierte fir d’Egalitéit tëscht Fraen a Männer an de ministeriellen Departementer an de Verwaltunge festleet. ¹

Esou gëtt en oder eng Delegéiert-en fir d’Gläichstellung tëscht Fraen a Männer an all ministeriellem Departement oder staatlecher Verwaltung designéiert.

Modus vun der Ernennung vun engem oder enger Delegéiert/-er fir d’Egalitéit beim Personal

De Modus vun der Ernennung vun engem oder enger Delegéiert/-er fir d’Egalitéit am ëffentlechen Déngscht variéiert, jee nodeem ob et eng Personalrepresentatioun am ministeriellen Departement oder an der staatlecher Verwaltung gëtt oder net:

Den oder d’Gläichstellungsdelegéiert/-en gëtt vum Ressortminister aus den Agente gewielt, déi eng Kandidatur agereecht hunn. Kandidat/in fir dës Nominatioun kann all Agent/-in ginn, déi an engem Service, enger Verwaltung oder engem ëffentleche Gebai affektéiert ass, an déi de Statut vum Beamten oder Employé-e huet.

Sollt keng Kandidatur virleien, da benennt de Ressortminister eng Persoun aus dem Personal als Delegéiert/-en, déi déi uewe genannte Konditioune fir eng Nominatioun erfëllt.

An engem ministeriellen Departement oder enger staatlecher Administratioun, wou et keng Personalrepresentatioun gëtt…

An de ministeriellen Departementer oder staatlechen Administratiounen, déi iwwert eng Personalrepresentatioun verfügen, designéiert dës aus hire Memberen en oder eng Delegéiert/-en fir d’Egalitéit.

Dispens vum Service

Fir seng/hir Aufgaben erfëllen ze kënnen, déi him/hir uvertraut ginn, kritt den oder d’Delegéiert/-en fir d’Egalitéit eng Dispens vum Service vu véier Stonnen de Mount. Hien oder si kann och eng Formatioun maachen, fir seng Missioune besser erfëllen ze kënnen.

Nieft de Projeten oder Analysen, déi den oder d’Delegéiert/-en wëll realiséieren, sinn déi véier Stonnen Dispens vum Service och dofir geduecht, fir Kolleeginnen a Kolleegen nozelauschteren an ze beroden, déi sech diskriminéiert fillen oder ënnert enger Situatioun leiden, déi hirem Wuelbefannen op der Aarbecht schuet. Och wann dës Period vu véier Stonne vun der Legislatioun esou virgesinn ass, gëtt dem oder der Delegéiert/-er geroden, fir sech entweder d’office, oder ausnamsweis fir e prezise Mount, méi Zäit accordéieren ze loossen, falls d’Realiséierung vun enger Moossnam oder e Rot fir eng Kolleegin oder e Kolleeg dëst verlaangen.

Rechter, fir mat deenen aneren Instanzen vum ministeriellen Departement oder der staatlecher Administratioun zesummen ze schaffen

Den oder d’Delegéiert/-en fir d’Egalitéit beim Personal huet d’Recht, fir fräi an direkt mam Personal vu sengem ministeriellen Departement oder Administratioun zesummen ze schaffen.

Fir kënnen eng Analyse iwwert d’Evolutioun beim Personal vu sengem ministeriellen Departement oder Administratioun ze maachen, kann den oder d’Delegéiert/-en, genau wéi d’Personalrepresentatioun, froen, fir no Geschlecht ventiléiert Statistiken iwwer Rekrutementer, Promotiounen, Versetzungen, Entloossungen, Remuneratiounen a Formatiounen ze kréien.

Iwwert d’Plattform Qliksense, déi vum Centre de gestion du personnel et de l’organisation de l‘État (CGPO) a vum Centre des technologies de l’information de l’État (CTIE) geréiert gëtt, kann den oder d’Delegéiert/-en fir d’Gläichstellung zu all Moment aktuell Statistiken iwwert d’Zesummesetzung vum Personal consultéieren.

Den oder d’Delegéiert/-en fir d’Egalitéit huet deemno spezifesch Responsabilitéiten, wat d’Informatioun an d’Consultatioun vu Froen ubelaangen, déi d’Struktur an d’Evolutioun vun der Aarbecht betreffen.

Generell gesi bestinn d’Missioune vum/vun der Delegéierten/-er an der Recherche vu Léisungen zu all Fro, déi direkt oder indirekt mat der Gläichbehandlung tëscht Fraen a Männer ze dinn huet, déi an engem ministerliellen Departement oder an enger staatlecher Administratioun schaffen.

Dëst betrëfft och all Thematik, déi ze dinn huet mat:

• Dem Zougang zur Aarbecht
• Dem Rekrutement an de Servicer (interne Wiessel)
• Dem Accès zu Formatiounen
• De Professionelle Promotiounen
• Den Aarbechtskonditiounen
• Der Remuneratioun. ²

Vertraulechkeet

Am Kader vun der Ausféierung vun de Missiounen, déi him/hir uvertraut sinn, muss den oder d’Delegéiert/-en fir d’Gläichstellung alles, wat hien oder si gewuer ginn, vertraulech behandelen. Hien oder si ka keng Informatioune viruginn, ouni schrëftlech vun der betraffener Persoun dofir autoriséiert ginn ze sinn.

Joresbericht

Den oder d’Delegéiert/-en fir d’Egalitéit iwwerreecht dem Ressortminister oder sengem Chef vun der Administratioun e Joresbericht iwwert seng Aktivitéiten. Hien oder si ass och gehalen, fir d’Personal iwwert seng/hir Aktivitéiten z’informéieren.

Am Prinzip gëtt iwwert d’Verëffentlechung vun enger Aarbechtsoffer rekrutéiert, Entretiene mat de potentielle Kandidaten/-innen gefouert an d’Entscheedung iwwert d’Wiel vum oder vun der d’Kandidat/-in hëlt de Ressortminister oder de Chef vun der Administratioun.

An dëser Prozedur brauch d’Erhale vun der Egalitéit tëscht Fraen a Männer eng methodesch Approche a sämtlechen Etappe vum Rekrutement:

D’Offre d’Emploi

Dës ass d’"Fënster" vum ministeriellen Departement oder der staatlecher Administratioun, wëll duerch si gëtt d’Opmierksamkeet vum Public op den Interessi vum Poste gelenkt, dee geschaf soll ginn. Aus deem Grond ass et wichteg, datt de Numm vum Posten esou erausgesicht gëtt, datt sech gläichermoosse Frae wéi Männer domadder kënnen identifizéieren. Dëst gëllt och fir d’Beschreiwung vun den Tâchen, déi esou solle beschriwwe sinn, datt se den Interessi vu béide Geschlechter op sech zéien. Fraen a Männer sollten sech virstelle kënnen, op dësem Posten ze schaffen. Dëst ass och wichteg bei sougenannten atypesche Posten, entweder fir Fraen oder fir Männer. Esou sollt sech eng Fra beispillsweis virstelle kënnen, fir an engem technesche oder wëssenschaftleche Service ze schaffen, genausou wéi e Mann sech sollt virstelle kënnen, fir an engem soziale Service vum Staat ze schaffen.

D’Virstellungsgespréich

D’Presenz vum oder vun der Delegéierten/-er gëtt recommandéiert fir all Virstellungsgespréich, dat an engem ministeriellen Departement oder an enger staatlecher Administratioun stattfënnt. Dëst erlaabt et sécherzestellen, datt all Kandidat/-in gläichwäerteg behandelt gëtt.

D’Wiel vum/vun der beschte-r Kandidat-in fir e Posten

Nodeems den oder d’Delegéiert/-en fir d’Gläichstellung tëscht Fraen a Männer sech all d’Kandidaturen ugekuckt huet, gëtt hien oder si dem Ressortminister oder dem Chef vu senger Administratioun säin Avis iwwert d’Wiel vum/vun der Kandidat/-in, déi/dee soll zréckbehale ginn.

Am Fall wou eng Ënnerrepresentatioun vun engem vun den zwee Geschlechter am ministeriellen Departement oder an der staatlecher Administratioun besteet, déi e fräie Posten huet, kann de Ressortminister oder de Chef vun der Administratioun den oder d’Kandidat/-in wielen, andeems hien oder si eng positiv Diskriminatioun uwent. Dës gesäit vir datt den Employeur, bei gläicher Qualifikatioun, Talent a Beruffserfarung, kann déi Persoun virzéien, der hiert Geschlecht aktuell am respektive Service ënnerrepresentéiert ass. Et handelt sech heibäi em eng temporär Mesure, déi d’Erreeche vun enger Paritéit tëscht Fraen a Männer uviséiert.

De Rekrutement an de Servicer (interne Wiessel)

Wann eng Administratioun d’Méiglechkeet offréiert, fir intern de Posten ze wiesselen, dann ass dëst ëmmer exemplaresch. Engersäits kann dëst d’Wuelbefanne vum Personal op der Aarbecht steigeren, wëll en oder eng Agent/-in, deen oder déi de Service wiesselt, sech a sengem beruffleche Liewe mat neien Defie konfrontéiert gesäit, wat gutt fir seng/hier Motivatioun ass. Vu Säite vum Employeur erhéije periodesch Changementer vum Personal an den Aktivitéitsberäicher d’Kontinuitéit vun der Aarbecht, wëll eng gréisser Unzuel vun Agent-in-en iwwert d’Beruffserfarung verfüügt fir – och wann et nëmme provisoresch sollt sinn – en-g Aarbechtskolleeg/-in an engem anere Service z’ersetzen.

Den oder d’Delegéiert/-en fir d’Gläichstellung kann d’Gestionnaire vum Personal an esou Entscheedungen assistéieren, wëll d’Iwwerwaachung vum Accès zu professionelle Promotioune fir Fraen a Männer Deel vu sengen/hire Missiounen ass.

Formatioune sinn e Schlësselelement fir déi perséinlech a professionell Entwécklung vum Personal, wëll d’Uneegne vu neie Kompetenzen net just d’Motivatioun steigert, mä et och erlaabt, fir d’Aarbechtsofleef ze verbesseren.

Leider kann et aus villerlee Grënn en ongläichen Accès zu Formatioune ginn, oft och onfräiwëlleg. Esou muss beispillsweis d’Gestioun vum Personal ëmmer drop uecht ginn, datt:

• Formatioune fir all Member vum Personal proposéiert ginn, och fir Kolleeginnen a Kolleegen, déi net op Decisiounsposte schaffen;
• Jiddereen encouragéiert gëtt, fir reegelméisseg Formatiounen ze maachen, mat spezifesche Preferenzen, déi eventuell bei den individuellen Entretiene kéinten identifizéiert ginn;
• Agentinnen an Agenten, déi net Vollzäit schaffen, och kënne Formatioune maachen, déi un d’Horaire vun hirer Presenz adaptéiert gi sinn.

Och hei kann den Delegéierten oder d’Delegéiert den Accès zu Formatioune fir d’Personal iwwerwaachen an eventuell Inegalitéiten dem Chef vun der Administratioun, respektiv dem Service vun der Personalgestioun signaléieren.

Dëst ass sécherlech ee vun den delikaatste Beräicher ënnert de Missioune vun engem oder enger Delegéierten/-er: Hien oder si beméit sech ëm d’Protektioun vum Personal vum ministeriellen Departement oder senger Administratioun géint sexuell oder moralesch Belästegung op der Aarbechtsplaz. Nieft de preventiven Initiative beréit an assistéiert hien oder si déi potentiell Affer vu sexueller oder moralescher Belästegung am Kader vun hire beruffleche Relatiounen.

Fir dëst ze realiséieren, ass den oder d’Delegéiert/-e gehalen, all d’Faite vertraulech ze behandelen, déi him oder hir zougedroe ginn. Hien oder si kann dës just verbreeden ënnert der Konditioun, datt hien oder si eng schrëftlech Autorisatioun dofir vun der betraffener Persoun kritt huet. Dës Vertraulechkeet, vum Legislateur virgesinn, schützt am Fong déi béid Parteien: D’Affer kann sech wuel spieren an an aller Diskretioun iwwert seng Doleance schwätzen, an den oder d’Delegéiert/-e ka ganz akkurat evaluéieren, wéi eng Aktiounen hien oder si als nächst wëllt ënnerhuelen. An dësem Kontext schützt d’Gesetz den oder d’Delegéiert/-en verstäerkt an der Ausübung vu sengen/hire Funktiounen, andeems et preziséiert, datt hien oder si kee Schued däerf huelen duerch d’Ausübung vu sengen/hire spezifeschen Aktivitéiten am Interessi vun der Egalitéit tëscht Fraen a Männer.

Selbstverständlech muss dat ministeriellt Departement oder d‘Administratioun dem oder der Delegéierten/-er eng Raimlechkeet zur Verfügung stellen, wou Kolleeginnen a Kolleegen an aller Diskretioun empfaange kënne ginn, fir mat hinnen ze diskutéieren. An dësem Kontext muss den oder d’Delegéiert/-en sech mam Chef vun der Administratioun iwwert d’Auerzäiten an d’Ofleef vun de Consultatiounen eenegen, woubäi d’Dauer vun dësen Entrevuen dem Compte d’épargne-temps (CET) vum/vun der Delegéiert/-en ugerechent gëtt.

Als Delegéiert/-en ass een natierlech net forcement a Psychologie oder Gestioun vu Konflikter forméiert. Trotzdeem sinn d’Delegéiert net eleng a kënnen Affer vun Diskriminatiounen oder Belästegungen u spezialiséiert Instanze weiderleeden, déi dem ëffentlechen Déngscht zur Verfügung stinn.

Nieft de Relatiounen, déi den oder d’Delegéiert/-en fir d’Gläichstellung mam bezuelte Personal ënnerhält, setzen seng Aufgaben hien oder si och an eng direkt Relatioun mat der Direktioun vu sengem ministeriellen Departement oder vu senger Administratioun.

Esou kann den oder d’Delegéiert/-en fir si:

• Propositioune formuléieren iwwert all Fro, déi direkt oder indirekt mat der Gläichbehandlung tëscht Fraen a Männer ze dinn huet, déi an der Administratioun, am Service oder ëffentleche Gebai schaffen, an dëst besonnesch bei Sujete wéi e gläichen Zougang zur Aarbecht, de Recrutement an de Servicer, den Accès zu Formatiounen a professionelle Promotiounen, esou wéi d’Remuneratioun an d’Aarbechtskonditiounen.

An dësem Kontext kann den oder d’Delegéiert/-en och en Avis iwwert d’Aarbechtszäite formuléieren, déi an senger Administratioun, sengem Service oder ëffentleche Gebai applizéiert sollte ginn (fix Plagen), iwwert d’Bezuelung (Typpe vu uwennbare Kontrakter), d’Aarbechtskonditiounen, d’Méiglechkeeten, fir eng Promotioun ze kréien, d’Méiglechkeeten, fir intern de Service ze wiesselen, d’Implizéieren an den Entscheedungsprozess an der Administratioun, dem Service oder ëffentleche Gebai, esou wéi iwwert déi hierarchesch Responsabilitéiten.

• bei sengem Virgesetzten individuell oder kollektiv Reklamatioune vun enger oder méi Persounen areechen, déi sech ongerecht behandelt fillen, ënnert der Konditioun, datt en de schrëftlechen Accord vun der oder de betraffene Persounen huet.

Den oder d’Delegéiert/-en kann Agent-in-en, déi Affer vun enger sexueller oder professioneller Belästegung an hirem berufflechen Ëmfeld gi sinn, assistéieren a beroden. Den oder d’Delegéiert/-en kann, fir d’Situatioun vun engem oder enger diskriminéierte-r Kolleeg-in ze verbesseren, säi Virgesetzten oder de Responsabelen vum Personal consultéieren.

• Sengem Ressortminister Sensibiliséierungsaktiounen, Preventiounsaktioune géint sexuell a professionell Belästegung esou wéi Moossnamepläng proposéieren, déi d’Egalitéit tëscht Fraen a Männer promouvéieren.

Wëll den oder d’Delegéiert/-en als Kontaktpersoun fungéiert fir all Uleies vun engem Member vum Personal wéinst eventuellen Diskriminatiounen oder Ongläichheeten opgrond vum Geschlecht, kann hien oder si dem Ressortminister och Sensibiliséierungsaktioune fir d’Personal proposéieren. Esou kéint beispillsweis eng Administratioun, e Service oder en ëffentlecht Gebai hiert Personal iwwert eng Optimiséierung vun de perséinleche Relatiounen ënnertenee sensibiliséieren, déi zu enger Verbesserung vum Wuelbefannen op der Aarbecht fir jidderee féiere kann. Des weidere kéint d’Personal eng Formatioun iwwert déi verschidde Forme vun Diskriminatioune maachen, déi hinnen et géif erméiglechen, méi sensibel fir eng antizipéiert Detektioun vun engem oder enger Mataarbechter/-in op der Aarbechtsplaz ze sinn, dem oder der et net gutt geet. Esou kéint eng virzäiteg Entdeckung vu psycheschem Stress bei engem oder méi Membere vum Personal psychesch Stéierungen, Burnouten an deemno laang Krankeschäiner vermeiden.

• En Avis fir all Demande op Deelzäit- oder Mi-temps-Aarbecht verfaassen. ³

Am Allgemenge kann den oder d’Delegéiert/-e ënnersichen an, bei Bedarf, Sensibiliséierungsmoossnamen proposéieren, fir eng professionell Kultur ze schafen, déi d’Huele vu Congé aus familiäre Grënn ënnerstëtzt. Heibäi versteet et sech vum selwen, datt Leit, déi esou e Congé geholl hunn, net an der Entwécklung vun hirer professioneller Karriär „bestrooft“ däerfe ginn.